ФИФА ги призна грешките во подготовката на проектот ФФЕ и изрази поддршка за Инфантино

Во Рабат, Мароко синоќа се одржа состанок на раководството на ФИФА, на кој присуствуваа претседателот на ФИФА, Џани Инфантино, генералниот секретар Матијас Графстром и членовите на Управниот совет.

Генералниот секретар на ФИФА и присутните членови на Управниот совет ја потврдија својата целосна поддршка за претседателот на ФИФА, Џани Инфантино. Исто така, беше објавено дека предлогот за создавање на „FIFA Forward Enterprise“ (FFE), кој би се занимавал со продажбата на комерцијални права на ФИФА и операциите за турнири, е повлечен поради грешки во подготовката.

– Секогаш има нешто да се научи, а ФИФА ќе продолжи да ги подобрува своите процеси врз основа на овие научени лекции. Во исто време, важно е да се нагласи во овој случај дека, и покрај направените грешки, сите дејствија беа спроведени во целосна согласност со регулаторната рамка на ФИФА.
Ќе се соработува тесно со релевантните засегнати страни за да истражи како понатаму да го поддржи развојот на фудбалот преку програмата „FIFA Forward“ во интерес на сите 211 асоцијации – асоцијации членки, конфедерации и регионални асоцијации, се наведува во соопштението за медиумите.

Организацијата, исто така, потенцира дека нема намера да толерира напади врз нејзиниот углед и ќе преземе сите потребни мерки за да го заштити.

На 28 јули, ФИФА ја објави својата намера да создаде нов субјект на кој планира да ги пренесе медиумските и комерцијалните права на организацијата, вклучително и за Светското првенство. Се очекуваше да бидат продадени повеќе од 20 проценти од нејзините акции. За овие удели, приватните инвеститори би платиле приближно 4,2 милијарди долари, кои ФИФА вети дека ќе ги потроши за развој на фудбалот. Ова предизвика бура од реакции и најави за бојкот на Мундијалот од страна на сите европски репрезентации.

МИА