Црвениот крст на град Скопје со мобилни тимови на терен поради најавените топлотни бранови

Црвениот крст на град Скопје започнува со теренски активности насочени кон заштита на граѓаните од последиците од најавените високи температури и топлотни бранови.

-Согласно искуствата од претходните години, мобилни екипи составени од волонтери од Тимот за одговор при катастрофи на Црвениот крст на град Скопје ќе патролираат низ градот, ќе укажуваат прва помош, по потреба ќе вршат транспорт на граѓани до здравствени установи, како и ќе дистрибуираат вода и информативни флаери со препораки за заштита од високите температури, соопштуваат од Црвениот крст на град Скопје.

Активностите ќе се реализираат денеска и утре (29 и 30 јуни), во периодот од 11:00 до 16:00 часот. На терен ќе бидат ангажирани 30 волонтери, организирани во 10 мобилни тима, со поддршка од шест возила.

Во рамки на акцијата, дневно е планирана дистрибуција на 1.000 шишиња, односно околу 500 литри вода, на граѓаните кои ќе имаат потреба.

Од Црвениот крст на град Скопје информираат дека со овие активности активно придонесуваат за заштита на здравјето на граѓаните, со акцент на превенцијата и навремената теренска поддршка што ја обезбедуваат обучените волонтери за време на топлотните бранови.