Минчев: Нема веќе доживотни функции и недопирливи позиции

Нема веќе доживотни функции и недопирливи позиции, управните одбори се сведуваат на три члена, а статусот в.д. станува исклучок строго временски и правно ограничен, рече денеска министерот за јавната администрација Горан Минчев, презентирајќи го Предлог-законот за високите раководители на органите на државната управа и фондовите.

На јавна дебата за Предлог-законот, Минчев напомена дека со предвиденото решение прв пат се воспоставува единствена и кохерентна рамка за уредување на највисоките државни раководни функции - кој, како и под кои услови ги води клучните институции.

-Прв пат се воспоставува единствена, јасна и системска рамка за именувањето, мандатот, одговорноста и разрешувањето на највисоките раководни позиции во администрацијата. Воведуваме појасни и унифицирани критериуми за избор на директори, државни секретари и членови на колегијални органи на државната управа, но и за членови на управни одбори за кои досега не постоеја речиси никакви правила, подвлече Минчев.

Според него, мерит принципот станува правило, а не исклучок - оној што раководи ќе мора да знае, да може и да одговара.

Законското решение предвидува транспарентна постапка за именување на високо раководните функционери, но и јасно ги уредува мандатите и го ограничува изборот.

-Позицијата веќе не е титула, туку одговорност. Раководителите ќе имаат јасна обврска да испорачуваат резултати, потенцира Минчев.

Предлог-законот за високите раководители на органите на државната управа и фондовите од 31 декември е на ЕНЕР.

-Кога зборуваме за реформи во јавната администрација мислиме на суштински промени во чие спроведување се вклучени сите засегнати страни. Дијалогот, а не наметнувањето е единствениот пат за носење квалитетни решенија, рече министерот.

На јавната дебата, покрај директори на институции и раководни лица, присутен е и генералниот секретар на Владата, Игор Јанушев.

МИА