Христијан Бошевски најсреќен на Водици во Битола

Младиот тинејџер Христијан Бошевски (16) од Битола е најсреќното момче учесник на традиционалната манифестација, пронаоѓање на светиот крст во водите на црковниот базен во Храмот „Свети Велиомаченик Димитриј“ во Битола.

Меѓу дваесеттината учесници, Бошевски успеа прв да скокне во базенот и да го пронајде спуштениот свет крст, чин организиран од свештенослужители на преспанско-пелагониската епрахија.

- Мојата традиција почна минатата година, а оваа година со многу среќа успеав да го пронајдам и земам во свои раце богојавленскиот свет крст. На сите верници им го честитам празникот Водици, изјави Христијан Бошевски, по завршувањето на манифестацијата, примајќи честитки за постигнатиот успех.

Според востановената традиција, осветување на водите и полагање свет крст беше организирано и во други цркви и манастири на преспанско-пелагониската епархија. 

МИА