Засилена дипломатска активност меѓу САД и Мексико поради најавите за воени удари врз картелите

Американскиот државен секретар Марко Рубио оствари телефонски разговор со мексиканскиот министер за надворешни работи Хуан Рамон де ла Фуенте, со цел зајакнување на соработката во борбата против наркокартелите. Разговорот доаѓа по заканите на претседателот Доналд Трамп за можни копнени напади врз криминалните мрежи во Мексико.

„Државниот секретар Рубио разговараше со министерот Де ла Фуенте за потребата од посилна соработка за разбивање на насилните наркотерористички мрежи во Мексико и запирање на трговијата со фентанил и оружје“, соопшти портпаролот на Стејт департментот, Томи Пигот.

Мексиканската претседателка Клаудија Шејнбаум во петокот му наложи на шефот на дипломатијата да ја интензивира координацијата со Вашингтон. Тензиите во регионот се на високо ниво по минатонеделната американска воена акција во Венецуела, во која беше заробен претседателот Николас Мадуро, што дополнително ги подгреа стравувањата од слични интервенции на мексиканска територија.

МИА