Пензионерите поделени околу протестот пред Уставниот суд

Дел од пензионерите утре ќе протестираат пред Уставниот суд. Незадоволни се што судот поведе постапка за оценување на уставноста на линеарното покачување на пензиите. Сепак, ваквата иницијатива не е поддржана од сите пензионери. Сител контактираше со дел од пензионерите кои пред две години дојдоа од повеќе градови во Скопје и протестираа барајќи линеарно зголемување. Tие велат дека ќе ја чекаат одлуката на судот. Додека нема одлука, не гледаат причина да се протестира. Затоа утре нема да одат пред Уставен.

Од судот објаснија двете зголемувања од по 2.500 денари воопшто нема да ги разгледуваат, а за новото линеарно се уште се собираат мислења.

Претседателката на Сојузот на здруженија на пензионери, исто така, објаснува дека зголемувањата кои досега се исплатени никој нема да ги враќа. 

„Пензионерите не треба да стравуваат дека тие 5 илјади денари ќе треба да ги враќаат и дека судот ќе донесе некаква поништувачка одлука. Самиот суд се прознесе дека тоа нема да се случи бидејќи тој закон со кој беше признаено тоа право е надвор од тој поредок“ – Станка Трајкова, претседател на СЗПМ

Ова следи откако премиерот Мицкоски кажа дека судијка на Уставниот суд, според негови информации, ја има потпишано одлуката за укинување на линеарното зголемување на пензиите.
Во меѓувреме, исплатата на ноемвриската пензија почна во петокот, а ќе заврши утре. Од Фондот за пензиско велат дека исплатата на пензиите не е доведена во прашање, бидејќи Владата ја гарантира истата и не треба да има никаков сомнеж или страв дека пензии нема да има.

„Шпекулациите кои се пласираат од страна на СДСМ и политичкиот притисок кон Уставниот суд дека е загрозена исплатата на сегашните и идните пензии се неосновани и служат единствено за вознемирување на пензионерите и граѓаните во државата. Неодговорно е да се тврди дека исплатата на пензиите е доведена во прашање кога веќе се знае дека буџетот на Фондот на ПИОМ  за наредната 2026 година е речиси 151 милијарда денари за исплата на пензии, за здравственото осигурување на пензионерите, како  и за транзициските трошоци кон трите пензиски друштва од вториот столб“, велат од Фондот. 

Од лани досега Владата трипати ги зголеми пензиите, по 6 илјади денари исто за сите пензионери.