Поплави во општина Чешиново-Облешево

Неколкудневните интензивни врнежи предизвикаа сериозни проблеми во општина Чешиново-Облешево, каде што под вода завршија дворови, куќи, амбари и земјоделски површини. Најпогодени се селата Облешево, Спанчево, Чешиново и Чифлик. Кочанска Река се излеа и го поплави речиси целото Кочанско Поле, оставајќи зад себе значителна штета. Жителите велат дека секој час се зголемува бројката на поплавени домаќинства.

- Сега се околу дваесеттина домаќинства под вода. Имаме магацини полни со ориз, жива стока, гледаме да спасиме. Ситуацијата е алармантна бидејќи водата надоаѓа, изјави Тони Максимов, жител на село Облешево.

Кризниот штаб од рано утро е присутен на терен и се обидува да ја стабилизира состојбата. Се користи механизација за зајакнување и тампонирање на поплавените дворови, а помош пристигнува и од Територијалната противпожарна единица од Кочани. 

- Излезени сме на терен со целата механизација. Во постојана комуникација сме со месното население. Сепак морам да апелирам до целата јавност да пружи помош на нашата оопштина, бидејќи со тоа што располагаме не е доволно за да се справиме со сиуацијата. По домовите е навлезена вода. Оризовата арпа која со жива мака се собра од полињата, а остана и уште многу неожнеан ориз во полињата што моментално е поплавен. Навистина не знам какви ќе бидат последиците од сето ова, изјави Јорданчо Костадинов, градоначалник на Чешиново-Облешево.

Мештаните предупредуваат дека состојбата е влошена поради неуредени канали, кои, според нив, го отежнале природниот проток на водата.

- Неископаните канали , сами си го кажуат своето. Недоволно направено и овие количини од дожд еве што направија, изјави Иван Панов, жител на Чешиново-Облешево.

Градоначалникот Костадинов ги повикува сите жители што претрпеле штета да ја пријават во општината, а Комисија ќе излезе на терен за да изготви детален извештај за последиците од поплавите.