Ќе се укинат ли блок тарифите за струјата?

Уставниот суд ќе одлучува дали ќе се укинат блок тарифите за струјата. До судот е пристигната иницијатива во која пишува дека разликата меѓу првиот и четвртиот блок е 400%, што создава нерамноправна положба на потрошувачите.

Првиот човек на Регулаторната комисија вели каква и да е одлуката ќе ја почитуваат. Бислимовски е на ставот дека тарифните блокови придонеле да се намали потрошувачката на домаќинствата и да се испрати сигнал дека тие што трошат нерационално ќе платат повисоки сметки за струја. 

„Со блоковската структура се намалува потрошувачката кај домаќинствата и се остава простор за поголеми количини ЕСМ да не ги продава на ЕВН Хоум по цена од 65 евра која е за двапати пониска од пазарната и цена којашто е пониска дури и од производната цена на ЕСМ и јасно е дека таа цена доведува до загуби, но со блоковската структура и со тоа што малите потрошувачи имаат повисока цена на регулираниот пазар целта ни е што е можно повеќе количини на електрична енергија ЕСМ да ги продава на слободниот пазар каде цената е околу 130 евра за мегават час“ – Марко Бислимовски, претседател на РКЕ 

Лидерот на СДСМ смета дека блоковите треба да останат.

„Се постигнуваат две работи. Прво се штитат семејствата. Второ се стимулира заштедата на електрична енергија. Значи, секој којшто е рационален и којшто води сметка да штеди струја, прво ќе плаќа помалку и со тоа е заштитено семејството, а второ, е намалува и се штеди системот со намалена потрошувачка на енергија“ – Венко Филипче, претседател на СДСМ

Од ВМРО-ДПМНЕ, пак, засега не коментираат. Велат прво ќе ја чекаат одлуката на судот.

„Има иницијатива до Уставниот суд, па ќе ја почекаме официјалната одлука“ – Викторија Андоновска, ВМРО-ДПМНЕ

Идната недела Регулаторна ќе донесе цена за пренос и дистрибуција на електрична енергија и за операторот на пазарот. Според најавите, тука ќе нема поскапување. По ова, ЕВН ќе треба да направи пресметка за крајната цена и да ја достави на увид во комисијата. Она што сега се знае е дека ЕСМ од први јануари ќе и продава на ЕВН струја поскапа за 5%. 

Колкави ќе бидат сметките по Нова година ќе се знае за околу две недели. Новата цена ќе важи целата следна година.