4 деца од „Химо Хаџи Димов“ се хоспитализирани на Детската клиника, стигнаа и конечните резултати од испитувањата на водата

Водата во Димо Хаџи Димов е безбедна за пиење. Ова се конечните резултати за квалитетот на водата во училиштето кои ги изработи Институт за јавно здравје. Не е пронајдено присуство на тешки метали. Но, утврдено е присуство на норовирус кај шест ученици, во примероци кои биле донесени од родителите на децата кои имале стомачни заболувања. Норовирус е вирус кој се пренесува преку вода или храна заразена со фекалии и може да егзистира многу долго на работни површини.

Во меѓувреме, четири деца од училиштето Дим Хаџи Димов се уште се хоспитализирани на Детската клиника. Сите се во добра здравствена состојба. Во Клиниката од вторникот, заклучно со денеска вкупно 13 деца побарале помош, а скоро половина од нив останале во болница.

Сите пројавиле исти симптоми, стомачни заболувања, повраќање и дијареа. Досега во Институтот има 30 пријави, од кои 29 се деца и една наставничка.
Новости денеска не доаѓаат од АХВ. Оттаму за Сител велат дека се уште ги чекаат резултатите.

АХВ официјално се уште ги нема добиено резултатите од лабораториските тестирања од земените мостри храна, работни површини, прибор и опрема од спроведената вонредна инспекциска контрола на кујната и централниот магацин, на 26 овој месец во ООУ Димо Хаџи Димов во Скопје. 

Не се добиени ниту резултатите од спроведените превентивни вонредни инспекциски надзор и во деветте други училишта во Општина Карпош со кои стопанисува истиот оператор со храна.

Ситуацијата во Димо Хаџи Димов започна во вторникот кога голем дел на ученици не се појавија во училишните клупи, бидејќи имале стомачни заболувања. Поради ваквата состојба инспектори од ДСЗИ, АХВ и ИЈЗ влегоа во училиштето.

По земените мостри, резултатите покажаа дека на три чешми е пронајдена фекална бактерија, две во училниците и една во кујната. Истата бактерија е пронајдена и во мусаката од кујната. Резултат со присутна бактеријата стафилокока имала вработена во кујна, од брисот во нос, а кај едно дете откриен е норовирус. Надлежните се сомневаат дека токму овие бактерии се причините - зошто толку деца се пожалиле на стомачни тегоби.  

Во училиштето ќе се спроведе вонредна дезинфекција, а во понеделник училиштето продолжува со редовна настава.