Осудените лица во струмичкиот затвор добиваат шанса за средно образование

Нова можност за осудените лица во струмичкиот затвор.Покрај практичните програми, сега им се отвора и пат кон формално образование.Установата започна проект кој им овозможува на осудените лица да го дооформат своето средно образование. Целта е времето поминато зад решетки да не биде само издржување на казна, туку шанса за промена, напредок и полесна ресоцијализација и интеграција. За време на престојот во затвор, програмата е целосно бесплатна, а право да посетуваат часови и да полагаат испити имаат сите заинтересирани осудени лица кои го немаат завршено средното образование. 

Проектот се реализира во соработка со Државното средно училиште „Никола Карев“ – Струмица, чиј стручен кадар ја изведува наставата и го обезбедува целиот образовен процес.
Ице Беличев професор во ДСУ РЦСОО Нникола Карев Струмица

За осудените лица, ова претставува нова можност, но и значајна поддршка во процесот на личен развој додека се во установата. Очекувањата се дека стекнувањето диплома за средно образование ќе им овозможи полесен пристап до пазарот на трудот.

Казнено-поправната установа Затвор Струмица е од полуотворен тип и во неа се сместуваат лица осудени на казна затвор до три години. Во моментов, казна издржуваат 92 осудени лица, од кои околу 35% се работно ангажирани надвор од установата.