ВМРО-ДПМНЕ и Вреди тврдат дека коалицијата на Ахмети се распаѓа, ДУИ негира

Владејачките ВМРО-ДПМНЕ и ВРЕДИ прогнозираат распад на коалицијата предводена од ДУИ. 

Вчерашаната оставка на Кренар Лога од сите партиски функции на Алијансата за Албанците на Таравари, двете партии сметаат дека е прв чекор кон ситнење на поддршката за коалицијата на Ахмети. 

И ВМРО-ДПМНЕ и ВРЕДИ не кријат дека течат преговори со опозициски пратеници за зголемување на мнозинството во Собранието.

„Со повлекувањето на Кренар Љога, по заминувањето на Мендух Тачи, по паниката во ДУИ и троглавото молчење на Ахмети-Таравари-Села веќе осум дена, стана сосема јасно: НАИ повеќе не постои“, велат и од ВРЕДИ.

„Падот на НАИ е најголемиот доказ дека 20-годишната кула на измама се урива камен по камен. Албанскиот народ повеќе не прифаќа игри. Тие повеќе не прифаќаат етикети, навреди и закани. Албанците на нивниот „референдум“ го запечатија конечното ослободување.

ВЛЕН повторува: Ние сме тука, силни, обединети и со целосен легитимитет. Тие ја напуштаат сцената, ние влегуваме во ерата на одговорност“, стои во соопштението на ВРЕДИ 

Од ДУИ пак негираат криза во нивната коалиција. Без да ја коментираат оставката на Лога, од партијата тврдат дека не очекуваат да им се намали бројот на пратеници.

По изборните резултати ДУИ во следниот месец се подготвува и за партискиот конгрес на кој не исклучуваат можност за промени во партиските структури. 

Реформирање најавува и опозициската СДСМ, каде промените на највисоките партиски функции веќе стартуваа, со оставката на Ана Чупевска и поставувањето на Александар Трајановски за нов потпретседател. Во следниот период партијата ќе го одржи и конгресот на кој ќе се анализираат изборните резултати.