Сијарто: Зеленски нема да одлучува за пристапувањето на Украина во ЕУ, туку земјите членки

Шефот на унгарската дипломатија, Петер Сијарто, изјави дека украинскиот претседател, Володимир Зеленски, не е тој кој ќе одлучи дали таа земја ќе се приклучи на Европската Унија, туку земјите-членки.

Ваквата реакција Сијарто ја објави на Фејсбук откако Зеленски изјави дека Украина на крајот ќе стане членка на ЕУ, со или без унгарскиот премиер Виктор Орбан, и истакна дека унгарскиот народ веќе ја донел својата одлука.

- Не е претседателот на Украина тој што ќе одлучува колку е подготвена една земја за членство во Европската Унија или која земја може да се приклучи на Унијата, тоа го одлучува самата Европска Унија, каде што за ваквите одлуки се потребни едногласни ставови, изјави Сијарто синоќа, објави унгарското Министерство за надворешни работи, пренесува МТИ.

Претходно вчера, Зеленски изјави дека Украина ќе стане членка на Европската Унија без оглед на ставот на унгарскиот премиер Виктор Орбан, објави порталот Калибар.

Тој изрази уверување дека народот на Унгарија ја поддржува Украина, дури и ако ставот на владата на земјата е различен.

Зеленски рече дека членството во ЕУ е избор на украинскиот народ и нагласи дека патот на земјата кон пристапување нема да биде блокиран од ниту една земја-членка.

МИА