Меѓународна конференција за односите меѓу Западен Балкан и Кина

Во рамки на проектот „Мостови и бариери: Тридецениска траекторија на кинеско-македонските односи“ чиј носител е Фондацијата „Никола Кљусев“, денеска и утре ќе се одржи меѓународна конференција на тема „Односите помеѓу Западен Балкан и Кина: Надминување бариери, градење мостови“.

Истражувачкиот тим го сочинуваат тројца универзитетски професори: Билјана Ванковска, Лидија Георгиева и  Тони Милески од Универзитетот „Св. Кирил и Методиј“ во Скопје и двајца кинески истражувачи од Универзитетот Фудан во Шангај. Едногодишниот проектен грант е добиен од Институтот Кина - Централна и Источна Европа, од Будимпешта.

На конференцијата учество ќе земат 23 еминентни истражувачи од повеќе држави, меѓу кои: Велика Британија, Кина, Шведска, Албанија, Хрватска, Босна и Херцеговина, Црна Гора, Србија, Македонија, Грција и Бугарија. На конференцијата ќе се дебатираат билатералните односи на Кина со земјите од Западен Балкан и од ЕУ, преку идентификување на клучните двигатели и препреки, регионалната и глобалната динамика, како и зголемување на интердисциплинарниот дијалог.

На маргините на конференцијата ќе се одржи и промоција на книгата „Кооперативен мултиполарен систем: во потрага по нов светски поредок“, чии уредувачи се Билјана Ванковска, Ричард Саква, Џанг Веивеи и Тони Милески. Книгата, според организаторите, претставува прв научен труд од ваков вид во нашата земја, кој обработува актуелна тема поврзана со современите меѓународни трендови. Публикацијата е објавена на англиски јазик, и опфаќа трудови на 19 автори од повеќе држави.

МИА