Пад на вредноста на доларот поради намалување на кредитниот рејтинг на САД

Вредноста на американскиот долар забележа пад откако агенција Мудис (Moody’s) го намали кредитниот рејтинг на САД од Ааа на Аа11 поради големиот дефицит на федералниот буџет, високите трошоци за финансирање и планираните намалувања на даноците.

Доларот минатата недела забележа пад од 1,9 отсто во однос на шесте најважни светски валути.

Вредноста на еврото во однос на доларот забележа раст од 1,7 проценти односно едно евро се менува за 1,1360 долари. Американската валута забележа пад на вредноста во однос на јенот за 2,1 отсто – еден долар се менува за 142,55 јени.

Јавниот долг на САД изнесува околу 36,2 трилиони долари и би можел да се зголеми за уште 3,8 трилиони долари во следните десет години, бидејќи претседателот на САД, Доналд Трамп планира да ги намали даноците. Поради ова, приносите од американските државни обврзници значително се зголемија, што значи дека Владата мора да позајмува по повисока цена.

Намалувањето на даноците веројатно би ја стимулирало потрошувачката и би го поддржало економскиот раст, но од друга страна, јавниот долг би се зголемил, ако не се намалат владините трошоци.

Притисокот врз доларот се засили пред два дена, кога Трамп повторно и се закани на Европска Унија со царини од 50 проценти од 1 јуни, бидејќи не е задоволен од тоа како напредуваат трговските разговори меѓу САД и ЕУ.