Загадениот воздух ја полни Клиниката за пулмологија – Скопје и денеска меѓу најзагадените градови во светот

Најзагаден град во Европа и меѓу првите 10 во светот. Веќе неколку денови во Скопје тешко се дише. Висока концентрација на штетни ПМ честички имаме речиси и во цела Македонија. Многу граѓани веќе ги чувствуваат последиците врз здравјето. Најзасеганати се лицата со хронични белодробни заболувања. На Клиниката за пулмологија бележат зголемен број на пациенти. Дневно во амбулантите имаат и над 100 прегледи, а исполнети се и местата за хоспитализација поради лошата комбинација на загададен воздух со вируси.

- Воздухот, особено во нашиот град, е загаден преку целата година, меѓутоа драматично станува за време на зимските периоди, потсети таа, а тоа имало големо влијание за влошувања кај пациенти со ХОББ, изјави д-р Јагода Стојковиќ, Клиника за пулмологија.

- Најмалите честички влегуваат во крвотокот и според последните статистики, секое 6-7 дете што се раѓа има проблеми со белодробниот систем поради загадениот воздух, изјави Д-р Оливер Зафировски, директор на Клиниката за пулмологија.

Токму цигарите и аерозагадувањето се главни причини и за хронична опструктивна белодробна болест, од која страда 8 проценти од населението во земјава. Пулмолозите советуваат да не се занемарува секоја кашлица и навреме да се побара лекарска помош.

- Многу е важно болеста да биде дијагностицирана рано, изјави д-р Деска Димитриевска, од Клиниката за пулмологија и претседател на Македонското респираторно здружение.

Лекарите апелираат секој од нас да придонесе за почист воздух, а надлежните институции да бидат поефективни за да го заштитат здравјето на граѓаните со поголема контрола врз индустријата и подобар јавен превоз.

- Прво мораме да имаме лична одговорност . Чадот кој се ослободува од цигарите е составен дел од загадувањето исто така и она што го користиме за греење, изјави Д-р Марија Здравеска, од клиниката за пулмологија.

- И да се исчистат улиците во Скопје, јас не памтам од кога не се исчистени, рече д-р Димитриевска.

Во меѓувреме, лекарите советуваат при висока загаденост на воздухот граѓаните кога излегуваат да носат маски.