Состојбата во транзитниот центар Табановце стабилна

Во Транзитниот центар Табановце денеска пристигнале 441 мигранти, дел од нив веднаш се упатиле кон соседна Србија, 13 се вратени од српска страна и се наоѓаат во центарот, извести координаторот на ТЦ Табановце, Горан Стојановски.

 

-Состојбата во центарот е мирна и стабилна. Вчера неколкумина од нив мирно протестираа со испишани пароли дека сакаат да го продолжат патот кон северните земји, но за десетина минути мирниот протест заврши, изјави Стојановски.

 

Информира дека капацитетот на транзинтиот центар речиси целосно е исполнет, а бројот на бегалци варира во зависност колку лица се пропуштаат од српската страна. 

 

Претходното деноноќие, според информациите на РЦУК Куманово, седумина мигранти побарале помош во болницата и Здравствениот дом во Куманово, при што на сите им е укажана помош. Центарот за јавно здравје извршил дезинфекција на вкупна површина од 3.000 метри квадратни, а екипите на „Чистота и Зеленило“ редовно го изнесуваат сметот.

 

Во меѓувреме во  центарот се тампонира просторот, се сервисираат тоалетите и се работи на водоводната мрежа. Бројните хуманитарни организации делат храна, облека и пружаат помош на бегалците сместени во Центарот. Се преземаат и посебни мерки за пружање помош на инвалидизираните лица, лицата со посебни потреби и други ранливи категории, децата и мајките.