Во невреме во Индија загинаа 24 лица, најголем број од удари на гром

Најмалку 24 лица загинаа во Индија во силното невреме што ја зафати земјата вчера и денеска, соопштија индиските власти.

Најмалку 18 од вкупниот број загинати луѓе се припишуваат на удари од гром, објави Би-Би-Си

Индискиот министер за внатрешни работи Амит Шах рече дека е „длабоко тажен поради загубата на животи“ и додаде дека локалните власти се ангажирани во хуманитарни активности.

Дождот оштети голем број куќи и усмрти добиток ширум западната држава Гуџарат, која беше погодена од обилни врнежи од дожд, придружени со грмежи и град, во неделата и понеделникот, а во некои области наврнаа и до 144 милиметри дожд за 24 часа.

Во западниот дел на Индија денеска се очекува да продолжат врнежите од дожд и град.

Бројот на удари на гром во Индија се зголемува, така што се регистрирани повеќе од 18 милиони само помеѓу април 2020 година и март 2021 година, се наведува во студијата на Советот за промоција на системи за набљудување на климата.

Ова е зголемување од 34 отсто во однос на истиот период лани. Научниците предупредуваат дека зголемувањето на глобалните температури ги поттикнува екстремните временски настани.