Обама побара од Турција да ги прекине артилериските напади во Сирија

Американскиот претседател Барак Обама во вчерашниот телефонски разговор побарал од турскиот колега Реџеп Тајип Ердоган турските сили да ги прекинат нападите врз делови на сириска територија.

- Претседателот Обама изрази загриженост поради неодамнешните дејствија на сириските владини сили во северозападниот дел на Сирија и истовремено побара да се прекине со сите потези кои водат до ескалирање на тензиите со Турција и силите на умерената опозиција. Тој, исто така, потсети на заедничките напори да се победи Исламската држава, се наведува во соопштението на Белата куќа.

Обама апелираше на Турција да покаже реципрочна воздржаност и да прекине со артилериски напади во овој дел на Сирија.

Според официјална Анкара, Обама на својот турски колега му изјавил дека Турција има право на самоодбрана.