Кинескиот претставник Ли Хуи ги повика другите земји да престанат да испорачуваат оружје на Украина

Претставникот на Кина за Украина, Ли Хуи, денеска ги повика другите земји да престанат да испраќаат оружје на бојното поле и да придонесат за мировните преговори, но не посочи дали е постигнат некаков напредок за време на неговата неодамнешна посета на Европа што ќе доведе до решение за конфликтот.

„Кина верува дека е важно да престане да испраќа оружје на бојното поле ако навистина сакаме да ја завршиме војната, да спасиме животи и да постигнеме мир. Во спротивно, тензиите само ќе растат“, изјави Ли.

Ли го упати повикот додека Вашингтон и неговите европски сојузници ја зголемуваат испораката на проектили, тенкови и друго оружје за украинските сили кои се обидуваат да вратат делови од територијата окупирана од руската војска.

Владата на кинескиот лидер Си Џинпинг вели дека е неутрална во руско-украинскиот конфликт и сака да биде посредник, но политички ја поддржува Москва.

Од 15 до 28 мај Ли ги посети Украина, Русија, Полска, Франција, Германија и седиштето на Европската унија.

Аналитичарите наведуваат дека е малку веројатно кинеската иницијатива да вроди со плод.