САД и Јужна Кореја спроведоа вежби на воздухопловните сили во близина на Корејскиот Полуостров

САД и Јужна Кореја денеска спроведоа заеднички воздушни воени вежби, вторпат во една недела, на кои учествуваа некои од најмодерните авиони на двете земји.

Двете држави спроведоа вежба над морето западно од Корејскиот Полуостров, а учествуваа јужнокорејски Ф35А и американски авиони Ф-22 и Ф-35Б, соопшти јужнокорејската војска.

Во соопштението се наведува дека воздухопловните сили на двете земји ќе продолжат да одржуваат заеднички воени вежби за зголемување на нивните капацитети за можен соодветен одговор на севернокорејските нуклеарни и ракетни закани.

Министерството за надворешни работи на Северна Кореја вчера оцени дека вежбите на САД и нивните сојузници ги достигнале, како што баведува, „екстремните црвени линии“ и се закани дека ќе го претворат полуостровот во „критична воена зона“.

Пјонгјанг, исто така, соопшти дека не е заинтересиран за дијалог сè додека Вашингтон води непријателска политика.