Четворица египетски војници загинаа, а 12 се повредени од подметната бомба во Синај

Четворица египетски војници загинаа, а уште 12 се ранети во експлозијата на подметната крајпатна бомба во околината на градот Ариш, на Синајскиот Полуостров, пренесоа светските агенции.

Далечински активираната бомба го погодила оклопниот транспортер во кој се превезувале војниците.

Меѓу убиените е еден полковник, а дел од ранетите се наоѓаат во критична состојба.

Според некои извори, во нападот има петмина загинати војници. 

Во регионот е почната операција на потрага по извршителите на нападот. Засега никој не ја презеде одговорноста за атентатот.

Минатата недела седуммина полицајци беа убиени во северниот дел на Синај, во напад за кој одговорноста ја презеде Исламска држава.

Во пустинската област Синај има чести напади на џихадистите врз египетските сили за безбедност. Екстремистите ги засилија своите напади откако армијата во 2013 година го собори од власта претседателот исламист Мохамед Морси.

Џихадистите досега убиле стотици војници и полицајци, а почнаа да напаѓаат и западни државјнаи и објекти низ Египет.