Голем интересот кај прилепските земјоделци за обновување на механизацијата

Прилепските земјоделци покажуваат огромен интерес за набавка на нова механизација, мерка од Програмата за рурален развој. Изминативе години преку 600 земјоделци ја обновиле механизацијата, а интерес има и за сегашниот јавен повик кој е во тек, изјави Горан Томески од Подрачната единица на Агенцијата за унапредување на земјоделството.

 

На денешната прес-конференција, Агенцијата и локалните власти ги повеикаа земјоделците да ги искористат можностите да ја обноват механизацијата преку мерката за набавка на земјоделска опрема и механизација од програмата за рурален развој. Повикот е отворен од 21 јануари и ќе трае до 20 февруари.

 

Според Томески, поволностите се уште поголеми зашто може да се пријават и нерегистрираните земјоделци и тутунарите.

 

- Мерката е популарна кај земјоделците од Прилеп, Кривогаштани и Долнени и секоја година средствата целосно се искористуваат.  Сега, покрај регистрираните земјоделци, може да конкурираат и нерегистрираните, односно сите кои имаат пријавено производство. Во мерката покрај сите фуражни и други култури, вклучен е и тутунот. Секогаш 50 до 60 проценти од барањата се одобрени, сега може да се аплицира и електронски. Како Агенција, помагаме земјоделците да изготват квалитетни програми, рече Томески.

 

Според него, половината или 300 од одобрените барања изминативе години се однесувале на набавка на нови трактори.

 

- Целта е да се обнови целокупната механизација зашто поголемиот дел, особено тракторите, се стари и по 30 години. Со новата механизација се зголемува продуктивноста, приносите и кон курентноста на земјоделците на пазарот, објасни Томески.

 

Агенцијата за унапредување на земјоделството за идниот месец, февруари, ја најави и новата мерка за поддршка на младите земјоделци. Почетниците-земјоделци ќе може да добијат и 600.000 денари или околу 10.000 евра неповратна помош што е сериозна финансиска инјекција.

 

Освен владините мерки за поддршка, на земјоделците им се на прасполагање и мерките од ИПАРД програмата.

 

Градоначалникот на Прилеп Марјан Ристески ја нагласи поддршката што ја имаат земјоделците од општината. - Ги повикувам земјоделците да ги искористат сите овие поволни мерки за да се подобри ефикасноста на земјоделското производство. Тука влијаат и субвенциите што им ги дава Владата. На овој начин се развива и општината зашто има поголем прилив на средства, рече Ристески.