Блинкен: Санкции сега против Русија би ја намалиле можноста за спречување на агресија врз Украина

Американскиот државен секретар Ентони Блинкен денеска ја отфрли идејата сега да се воведат економски санкции кон Русија, велејќи дека тие ќе ја намалат способноста на Западот да спречи можна руска агресија врз Украина. Руската акумулација на војници во близина на границата со Украина предизвика загриженост кај западните земји дека Русија би можела да ја нападне Украина. Доколку Русија навистина изврши напад, западните земји и се закануваат со санкции кои би можеле да имаат далекусежни економски последици.

Блинкен додаде дека и најмалиот агресивен руски влез во Украина ќе наиде на силен одговор.

На прашањето дали рацете на САД во однос на Украина се врзани поради потребата од руска поддршка во одвоените преговори за иранската нуклеарна програма, Блинкен, како гостин во програмата на каналот Си-Би-Ес, одговори дека „ни најмалку не се“.