Владиците Агатангел и Јосиф го посетија Дневниот центар за лица со хендикеп во Неготино

Владиците Агатангел митрополит Повардарски и Јосиф митрополит тетовско гостиварски денеска го посетија Дневниот центар за лица со хендикеп во Неготино.

Тие изразија задоволство од работата на Центарот и грижата за лицата со посебни потреби која ја дава неготинското здружение „Порака" кое раководи и со процесот на деинституционализација во Македонија.

- Морам да ја нагласам храброста и упорноста на вработените од Центарот на чело со директорката кои прават се за доброто на лицата со посебни потреби. Тие секогаш ќе ја имаат нашата поддршка, а на сите нив заедно со штитениците во Центарот им посакуваме здравје и среќа, рече Агатангел.

Директорката Гордана Трајковска се заблагодари за обезбеденото гориво за парното во Центарот и се заблагодари на посетата од високите гости.

- Убаво е покрај грижата од Министерството за труд и социјална кога се има и љубовта од разни донатори и секако Божјата љубов, нагласи таа. 

Сопственикот на ресторанот „Софра Вељанов" Бранко Вељанов денеска за педесетина штитеници традиционално обезбеди ручек.