Изречена досега највисоката казна за упадот во Капитол, престапник осуден на повеќе од пет години затвор

Федералниот суд на САД осуди на повеќе од пет години затвор демонстрант кој учествуваше во нападот на Капитол на 6 јануари 2021 година. Ова е досега највисоката казна за учеството во нападот на Капитол.

Американското Министерство за правда соопшти дека Роберт Скот Палмер од Ларго, Флорида, е осуден на 63 месеци затвор за напад на полицијата во немирите во Капитол.

Поддржувачите на поранешниот американски претседател Доналд Трамп на 6 јануари упаднаа во Капитол со намера да спречат потврдување на победата на Џо Бајден на претседателските избори во Конгресот.

Судот наведува дека Палмер фрлил дрвена даска и противпожарен апарат кон полицајците кои се обидувале да ги спречат демонстрантите, а потоа со шипка ги нападнал полицајците.

Палмер е првиот меѓу учесниците во немирите на 6 јануари кој е осуден по обвинение за напад, давање отпор или попречување на службено лице со употреба на оружје.

Палмер беше уапсен на 17 март. Тој се изјасни за виновен на 4 октомври.

Во нападот на Капитол загинаа пет лица, повредени се голем број полицајци, а причинета е штета од околу милион и пол долари. Повеќе од 700 демонстранти се обвинети, а Палмер е 65-та личност осудена на затворска казна.