Копија на Мона Лиза на аукција во Париз

Верна копија на познатата Мона Лиза од Леонардо да Винчи, насликана околу 1600 година и исклучително добро сочувана, ќе биде продадена на аукција на 9 ноември во Париз, соопшти куќата на Архириал.

– Не е невообичаено да се види копија од Мона Лиза, но оваа е во одлична состојба, пред се затоа што е насликана на дабова табла, додека другите се на платно – изјавија од аукциската куќа и додадоа дека авторот е непознат.

Се проценува дека копијата ќе достигне цена од 150.000 до 200.000 евра, пренесува Ројтерс.

Оригиналната Мона Лиза или Џоконда е насликана на почетокот на 16 век, купена од францускиот крал Франсоа I од сликар во 1518 година и се чува во музејот Лувр во Париз.