Притвор од 30 дена за жител на Доброште поради најдена дрога

Полицијата вчера најде дрога и во домот на 32-годишен жител на Доброште, откако во вторникот кај него беа најдени 13 пакувања кокаин.  По приведувањето во вторникот,  вчера со судска наредба од 14 часот и 30 минути до 16 часот, бил направен претрес во неговиот дом.

-Во домот на Н.А.(32) во тетовско Доброште биле пронајдени кокаин, МДМА (екстази) и дигитална вага. По приведувањето во вторникот навечер бил задржан во Полициската станица Тетово и со соодветен поднесок вчера е изведен  пред судија во претходна постапка на Основниот суд Тетово, кој му определил мерка притвор од 30 дена. Вчеравечер тој е спроведен во Казнено-поправната установа Затвор „Скопје“ во Скопје за издржување на притворот информира портпаролот на СВР Тетово, Марјан Јосифоски.

Осомничениот ќе одговара за кривично дело „неовластено производство и пуштање во промет на наркотични дроги, психотропни супстанци и прекурсори“, казниво по член 215 од Кривичниот законик.