Мицотакис: Грција е столб на стабилност во југоисточниот Медитеран

Грција е земја што претставува столб на стабилност во југоисточниот Медитеран, земја која дури и во тешкиот период на економската криза одвојуваше над два отсто од БДП за одбранбени трошоци, порача грчкиот премиер Кирјакос Мицотакис од Брисел пред почетокот на НАТО Самитот и додаде дека Грција од кризата излегува посилна и инвестира зголемени ресурси во нејзините воени можности, „за да биде уште поверодостојна во своите обврски кон алијансата“, јави дописничката на МИА од Атина

Мицотакис истакна дека Самитот е можност одново да се потврди евро-атлантската врска, но и да се потврди „посветеноста на заедничките вредности, принципи, но и единството на сојузот“.

-Се соочуваме со низа исклучително сложени предизвици, кои бараат ново прилагодување на стратегијата на нашиот сојуз. Ковид покажа колку се ранливи нашите општества на еден вирус кој не е ни видлив со голо око. Климатските промени, покрај економските и социјалните последници, ќе имаат значително влијание и врз безбедносните прашања, бидејќи ќе ги поттикнат миграциските бранови. И секако авторитарните режими ќе продолжат да го користат својот хибриден арсенал за да ги ослабат нашите демократски институции. Наспроти сето ова, агендата НАТО 2030 доаѓа да даде низа детални одговори, истакна Мицотакис.

На маргините на НАТО Самитот, грчкиот премиер имаше одвоени средби со премиерите на Велика Британија Борис Џонсон и на Албанија Еди Рама, а по завршувањето на Самитот ќе се сретне со турскиот претседател Реџеп Таип Ердоган.