Германија и Франција разгледуваат тужба на ЕУ против „Астра Зенека“

 Германија и Франција денеска побараа повеќе време да разгледаат дали ЕУ ќе ја тужи Астра Зенека за намалување на испораките на договорени вакцини, јавија германски медиуми, повикувајќи се на изјави на двајца дипломати. Тие тврдат дека повеќето членки на ЕУ ги поддржуваат правните постапки.

Дипломатите, кои одбија да бидат именувани, рекоа дека дискусијата за тужбата против Астра Зенека се одржала на состанокот на Европската комисија вчера.

Претходно, се појави информација дека Европската комисија се подготвува да поднесе тужба против Астра Зенека, јави европски „Политико“, повикувајќи се на пет неименувани дипломати на Европската унија.

На состанокот на амбасадорите повеќето земји-членки на ЕУ изјавиле дека ќе ја поддржат тужбата против фармацевтската компанија во врска со поплаките дека не доставила договорена доза на вакцини за коронавирус до Европската унија.

Судската постапка има за цел да ја принуди Астра Зенека да ги обезбеди дозите предвидени во договорот со ЕУ, наведува неименуван дипломат.