Дополнително олабавување на мерките во Грција

Од денеска започнува осмата фаза на укинување на рестриктивните мерки во Грција и постепеното враќање во новата нормалност со отворање на камповите за деца, дозволено организирање концерти и конференции, но и одржување претстави и културни манифестации, јави дописничката на МИА од Атина.

Дополнително, се отвораат и кината што работат во текот на целата година, како и казината и жичарите во цела Грција.

Сите ќе работат со посебни правила и протоколи, а според грчките медиуми, на културните манифестации и концертите сите треба да седат, да има по едно празно место, односно исполнетост до 75 отсто од капацитетот, задолжително носење маска при влезот и излезот.

Празно место меѓу седиштата треба да има и во кино салите што ќе работата со 65 проценти од капацитетот, нема да има пауза, а маската е задолжителна за вработените.

Во казината, според медиумите во Грција, на масите предвидени за седум лица, дозволени се три или четири лица.