Приведен крадец – „специјалист” за верски објекти

Полицијата привела лице кое се сомничи за повеќе тешки кражби во верски објекти регистрирани во последни три години. Приведениот и претходно бил осудуван, а до скоро по него била распишана потерница.

Вчера околу 13 часот на улица „ЈНА“ во Гостивар, полициски службеници на СВР Тетово – Надворешна канцеларија за криминалистички работи Гостивар го лишиле од слобода С.А.(54) од скопско Студеничани.

С.А. се сомничи дека изминатите три години на гостиварското подрачје извршил неколку тешки кражби, претежно во цркви, како и повеќе тешки кражби на други подрачја во нашата држава, исто така, најмногу во верски објекти. Освен во гостиварско, тој ооерирал и во кичевско и демирхисарско.

С.А. задржан е во Полициската станица Гостивар и по целосното расчистување и документирање на случајот ќе му бидат изготвени соодветни поднесоци, по што ќе биде спроведен во Казнено-поправната установа  „Идризово“ во Скопје за издржување на затворската казна.