Во Грција 2.401 заразен со Ковид-19 и 121 починат од почетокот на епидемијата

Во изминатите 24 часа во Грција се регистрирани 156 нови случаи на Ковид-19, од кои 150 се во хотелот со бегалци и мигранти во надлежност на Меѓународната организација за миграција, додека пак бројот на жртви од коронавирусот во земјата се зголеми на 121 лице, откако починаа уште петмина.

Претставникот на Министерството за здравство на Грција, професорот Сотирис Циодрас денеска соопшти дека вкупниот број заразени со новиот коронавирус е 2.401 лице, а 59 граѓани се лекуваат приклучени на апарати.

Професорот се осврна и на смртта на 35-годишен маж кој немал здравствени проблеми, а воедно е и најмладата жртва на Ковид-19 во Грција.

Рече дека во некои случаи се откриваат болести што претходно не биле дијагностицирани, во други случаи „прашањето останува без одговор“, а една од можните причини, Циодрас спомена дека е неможноста на организмот да се справи со големото присуство на вирусот.

Досега, во Грција се анализирани 55.666 примероци, 1.322 повеќе од соопштената бројка вчера.

Во однос на хотелот на Пелопонез во кој престојуваат бегалците и мигрантите, професорот Циодрас рече дека биле тестирани 497 лица, од нив 150 (148 бегалци и мигранти и двајца вработени) се позитивни на Ковид-19 и сите се асимптоматични.

Хотелот од четвртокот е во карантин, а во поширокиот регион каде што се наоѓа, воведен е полициски час во следните 14 дена.