Дали вчерашната средба со Димитриевски ќе го стави државниот врв во изолација?

Вицепремиерот Бујар Османи го откажа присуството на седницата на Советот за безбедност која попладнево се одржува во Претседателската вила на Водно откако градоначлникот на Куманово, со кого вчера имаше средба објави дека е позитивен на Корона вирусот. 

 Османи за Сител вели дека ќе остане изолиран до вторник по што ќе направи тестирање. 

 

„По позитивната потврда за СОVID-19 на Градоначалникот на Куманово а поради тоа што  вчера имавме состанок во општинскиот штаб во Куманово, и покрај тоа што цело време бев со лична заштита маска и ракавици за кои епидемиолозите сметаат дека се доволни за заштита, решив денес да не одам на состанокот на Советот за безбедност кај Претседателот и да се изолирам до вторник кога тестирањето треба да се направи според протоколите. Посакувам на градоначалникот на Куманово брзо закрепнување како и на сите погодени граѓани и што е можно поскоро да излеземе од оваа состојба заедно. Бидете здрави!“ – вели Османи за Сител. 

 

Покрај Османи, средба со Димитриевски вчера имаше и премиерот Оливер Спасовски и министерот за здравство Венко Филипче. 

 

Од кабинетот на Спасовски за Сител велат дека се правеле анализи и консултации со епидемиолозите а кога ќе биде направена проценката и донесена одлуката јавноста ќе биде информирана. 

 

Спасовски, Филипче и Османи денеска требаше да седат на заедничка маса заедно со Претседателот Пендаровски.

 

Се уште нема информација, дали покрај Османи, во изолација ќе одат и премиерот и министерот за здравство.

 

Претходно, по интервју со новинар заразен со Ковид19 во изолација заминаа лидерите на ВМРО-ДПМНЕ и СДСМ, Мицкоски и Заев.