Брнабиќ: Соработката со Приштина ќе зависи од нивното исполнување на обврските

Соработката на српските власти со косовските институции ќе зависи од нивното исполнување на меѓународните обврски поврзани со спроведувањето на Бриселскиот договор и укинувањето на таксите на увозот на стоки од Србија, изјави српската премиерка Ана Брнабиќ, јави дописнкиот на МИА од Белград.

-Отсекогаш сме биле подготвени да соработуваме и да разговараме со привремените косовски институции, но тоа ќе зависи од спроведувањето на Бриселскиот договор, односно од исполнувањето на обврската за формирање на Заедницата на српски општини (СЗО), како и од укинувањето на нецивилизациските такси, изјави Брнабиќ пред новинарите, прашана дали ќе соработува со новата влада на Косово.

Таа додаде дека идните разговори и соработката ќе зависат од „г-дин (Албин) Курти“ кој ќе биде косовски премиер.

-Ние сме подготвени да разговараме со сите, таму каде што живеат Србите за да се подобри нивната положба, кажа премиерката.

Таа оцени дека Српска листа во Косово има добиено 10 места во косовскиот парламент и дека сега ќе биде „посилен фактор на Косово“.