Израел ги суспендира контактите со ЕУ за мировниот процес со Палестинците

Израелската Влада одлучи да ги суспендира контактите со функционери на ЕУ околу мировниот процес со Палестинците.

Ваквото решение Владата го донесе како реакција на одлуката на Европската комисија за задолжително етикетирање на израелските производи, кои потекнуваат од еврејските населби на Западниот Брег и од Голанската Висорамнина.

Во соопштението на израелското Министерство за надворешни работи се вели дека премиерот Бенјамин Нетанјаху наредил „суспендирање на дипломатските контакти со институциите на ЕУ околу прашањето со Плестинците“.

Брисел смета дека изградбата на еврејските населби на Западниот Брег е илегална, што Владата на Израел каегорично го отфрла.

Нетанјаху, кој ја врши и функцијата шеф на дипломатјата, побарал од Министерството да ги прекине контактите со органите на ЕУ.

Пред две недели, Европската комисија одлучи производите што се внесуваат на територијата на ЕУ од Израел, задолжително да имаат етикета на која ќе се објасни од каде тие потекнуваат и на нив да биде истакнато за која еврејска населба станува збор, ако се произведени на Западениот Брег или Голан.

Станува збор за територии што се под израелска контрола по јунската војна во 1967 година.

Израел веќе ја осуди одлуката на Европската комисија како дискриминаторска и контрапродуктивна, но ЕУ смета дека градењето населби на територии освоени во војната, го попречува мировното решение со постоењето две држави - Израел и Палестина.