ДЕТАЛИ: Како починал екс-шефот на македонското воено разузнавање?

Нема траги на насилство ниту прострелни рани врз телото на екс-шефот на военото разузнавање Горан Софески, дознаваме од полициски извори кои се дел од увидот на терен. 

 

Според првичните и се уште неофицијални информации, Софески рано утрово бил пронајден мртов во атарот на кичевското село Раштани каде се упатил на лов. Телото го пронашле случајни минувачи. Местото се наоѓало на 5 километри од градот Кичево. 

 

Полицијата официјално соопштува дека вчера лицето Г.С. (44) било пријавено како исчезнато во полициската станица во Кичево од негови роднини. Ја потврдуваат и инфромацијата дека едно лице е пронајдено мртво во атарот на селото Раштани но не се соопштува неговиот идентитет.

 

-Неофицијални информации велат дека Софески имал проблеми со срцето, па најверојатно смртта настапила поради проблеми со овој орган. Сепак овие информации немаат официјална потврда бидејќи на терен е јавен обвинител кој врши увид. По комплетирањето на увидот и официјално ќе биде познато што е причината за смртта на Софески.

 

Полициски извори велат дека е неточна информацијата која ја објавија медиумите под контрола на опозицијата дека на терен биле излезени специјалните полициски екипи.