Самитот на АСЕАН во сенка на терористичките напади

Самитот на Асоцијација на нациите од Југоисточна Азија (АСЕАН), што денеска почна во Куала Лумпур, се одвива во сенка на неодамнешните терористички напади.

На дневен ред на самитот, на кој присуствуваат 18 лидери, меѓу кои и претседателот на САД, Барак Обама, се тероризмот и спорот во Јужно Кинеско Море.

На почетокот од самитот малезискиот премиер Наџин Ражак ги повика лидерите на борба против исламскиот тероризам, истакнувајќи оти „варварските акции не претставуваат ниту една раса или религија“.

Обама наведе дека нападот врз хотелот во Мали само ја зацврстила решеноста на САД и сојузниците да се борат против оние кои напаѓаат цивили.

- САД заедно со своите сојузници и партнери неумоливо ќе се бори против оние кои ги напаѓаат нашите граѓани. Ќе продолжиме да ги откриваме и уништуваме терористичките мрежи. Нема да дозволиме убијците да најдат засолниште, посочи Обама.

Поголемиот број на лидери на самитот на АСЕАН во Малезија допатуваа од самитот за Азиско-пацифичка економска соработка (АПЕК) што се одржуваше во Манила.