Османи и Фити договараат реактивирање на Советот за европска интеграција во МАНУ

Вицепремиерот за европски прашања Бујар Османи и претседателот на Македонската академија на науките и уметностите (МАНУ) Таки Фити денеска на работна средба разговараа за реактивирање на Советот за европска интеграција во рамки на МАНУ. Се согласија дека е неопходно вклучување експертски и стручни капацитети во подготовката за почеток на преговорите за членство во ЕУ.

- Имајќи го предвид напредокот во европските интеграции, особено почетокот на објаснувачкиот скрининг, потребно е да ги активираме механизмите за идентификување, мапирање и вклучување експертски и стручни капацитети кои припаѓаат на академската фела, но, исто така, од аспект на подготовката за почеток на преговорите, мапирање на сите научни и истражувачки капацитети и поединечни експерти кои се на располагање по поглавјата и подрачјата од правото на ЕУ, истакна Османи.

Османи, како што соопшти неговиот кабинет,  го информира академик Фити и за напредокот во исполнувањето на реформскиот процес, посочувајќи на инклузивноста наметната уште при имплементацијата на Планот 3-6-9, за што посочи и на потребата и од зајакнување и продлабочување на соработката во специфични области дефинирани и во Планот 18: правосудство, јавна администрација и безбедносните системи.

Соговорниците изразија согласност дека соработката меѓу СЕП и МАНУ мора да продолжи и да се интензивира, согласно предизвиците од европските интеграции, и да се интензивира.