Меѓународна ликовна колонија во Гевгелија

Под покровителство на општина Гевгелија, во организација на фондацијата „Аполонија“ во Гевгелија почна 17. Меѓународна ликовна колонија во чија работа годинава учествуваат 14 ликовни уметници од Франција, Германија, Бугарија, Србија, Грција, САД и Македонија.

Десетина дена сликарите ќе изработуваат дела по сопствен избор инспирирани од богатото и живописно гевгелиско поднебје кои по затворањето на колонијата преку изложба ќе и бидат презентирани на публиката, информира директорот на фондацијата, Аце Ристовски.

- Годинава, како и лани, учесниците на колонијата изразија желба три дена да престојуваат во планинското село Ума каде ќе работат на обновување на иконостасот на црквата „Свети Пантелејмон“ за која ќе изработат и една фреска. Останатите создадени дела на колонијата, по завршувањето на изложбата, остануваат во сопственост на фондацијата и ќе бидат дел од богатиот фонд на слики создавани од почетокот на колонијата до денес, рече Ристовски.

Уметнички селектор на колонијата „Аполонија 2018“ е гевгелискиот академски сликар Драги Хаџи-Николов, а покрај него нашата земја ја претставуваат сликарите Ниче Василев, Павле Кузмановски,  Трајко Јовановски, Александар Јовановски, Славица Михаилова и Фиљо Танов.