Штајнмаер ги повикува преговарачите за германска влада на одговорност

Германскиот претседател Франк Валтер Штајнмаер ги предупреди партиите кои водат преговори за формирање нова коалициска влада сериозно да си ја сфатат својата одговорност и да избегнат нови избори.

- Нема повод за панични расправи за нови избори, рече Штајнмаер за неделното изданите на весникот „Велт“.

Тој додаде дека секој кој ги набљудувал коалициските преговори претходните години или учествувал во нив, знае дека пред официјалниот почеток на преговорите партиите се обидуваат да го зголемат вниманието на медиумите.

- Но, се разбира, очекувам сите страни да бидат свесни за својата  одговорност, а тоа значи да не го враќаат мандатот на граѓаните, изјави Штајнмаер.

Тој порача дека не мора да биде лошо за демократијата ако  преговарачите на „Јамајка коалицијата“ се помачат околу прашања како што се миграција и климатски промени.

Исто така укажа дека демохристијаните на Ангела Меркел, Зелените и либералите би требало мирно да ги решат несогласувањата пред истекот на рокот денеска во 18 часот.

- Мора да биде јасно: од контроверзија каква што е неопходна за демократијата, не смеат да настанат ниту непомирливост, ниту непријателство, порача Штајнмаер.