Богдановиќ: Вработените во општина Центар ќе ги уживаат сите права од работен однос

Градоначалникот на општина Центар Саша Богдановиќ денеска најави дека како работодавач ќе потпише колективен договор со кој ќе се уредат прават и обврските на вработените во општината и оти тие ќе ги уживаат сите права од работен однос.

Тој на денешната средба со Пецо Грујовски, претседател на Синдикатот на работниците од управата, правосудните органи и здруженија на граѓани (УПОЗ), како што соопштија од неговиот Кабинет, посочил дека како градоначалник, согласно законските прописи, ќе се залага вработените во општината да ги уживаат сите права од работен однос.

- За таа цел договорено е правата и обврските на вработените да бидат регулирани со Колективен договор. Со овој Колективен договор, кој по усогласувањето ќе биде потпишан, ќе се уредуваат, во согласност со закон, правата, обврските и одговорностите на договорните страни, а особено склучувањето, содржината и престанокот на договорот за вработување и други прашања од работните односи, како и начинот и постапката за решавање на меѓусебните спорови, соопштија од општина Центар.

Оттаму додаваат дека со овој Колективен договор не можат да се утврдат помали права или понеповолни услови за работа од правата, односно условите утврдени со Закон. Во посебен дел ќе бидат предвидени правата на членовите на Синдикатот.