Србија ќе воведува дуално образование

Владата на Република Србија на денешната седница го усвои нацрт-законот за дуално образование. Со овој закон ќе се овозможи поефикасно образование, а на младите луѓе ќе им овозможи вработување веднаш по средното образование, соопшти владината Канцеларија за соработка со медиумите.

Предлог-законот има за цел прилагодување на потребите на стручното образование со економијата, намалување на невработеноста кај младите до 25 години и зајакнување на конкурентноста на српската економија на регионално и на глобално ниво.

Владата на Република Србија ги усвои и нацрт-измените на законите за предучилишно, основно и средно образование.

Со нив се редефинира времето поминато во училиштата, со што се гради една поинаква слика на училиштата како места за учење и развој на учениците, но, исто така, се ослободува и простор за воннаставните активности кои претходно биле запоставени.

Се прошируваат можностите и за образовниот туризам.

Училиштата и специјализираните  установи за деца и студенти кои имаат соодветни услови можат да станат центри за настава во природата, со што ќе се поевтини цената на таквите активности, но, исто така, ќе се помогне и во развојот на локално ниво.

Се воведува и нов концепт на државната матура, која треба да го подобри квалитетот на средното образование и да обезбеди квалитет на студентите за следниве нивоа на образование.