Седлоски го исполни ветувањето

Шефот на стручниот штаб на Вардар на прес конференцијата после натпреварот, ги искажа своите импресии од победата над Малме и пласманот во следната рунда од Лигата на шампионите. 

 

„Честитките одат за моите играчи кои што одиграа импресивен натпревар против Малме. И после водството на противникот во првиот дел, им кажав дека можеме да дадеме гол и да ја анулираме таа предност. Успеавме да израмниме со голот на Грнчаров, а веднаш потоа дојде и вториот гол со кој се стекнавме со водство. Знаевме дека после нашата предност, Малме ќе нападне за да израмни, а ние чекаме шанса од противнапад да дадеме уште еден гол. Успеавме во тоа во финишот од средбата“, вели Седлоски. 

 

Предводникот на „црвено-црните“ на средбата со новинарите откри еден интересен детал, дека дал ветување до сопственикот Сергеј Самсоненко дека Вардар ќе успее да го мине Малме. 

 

„Дадов ветување до г-нот Сергеј Самсоненко дека Вардар ќе го мине Малме, и тоа ветување се исполни. Ова е голем успех за Вардар, за целокупниот македонски фудбал и уште еднаш честитки до момците, до раководството до сите кои што се заслужни за ова што го направивме“, изјави Седлоски на прес конференцијата после натпреварот со Малме.