Средба Ахмети - Села, Касами не учествува

Лидерите на ДУИ Али Ахмети и на Алијансата за Албанците Зијадин Села попладнево одржуваат состанок во хотелот Александар Палас. На средбата што ја иницира Ахмети, според најавата, треба да се разговара за имплементацијата на програмските определби на албанските парламентарни партии.

На средбата, покрај Ахмети и Села, присуствуваат и Теута Арифи, Изет Меџити и Артан Груби од ДУИ, а Арбен Таравари од Алијансата за Албанците.

Иако поканет, на состанокот не дојде лидерот на БЕСА, Билал Касами. Од БЕСА преку соопштение предложија средбата да се одржи во Собранието на Република Македонија, а како точка на дневен ред да биде разгледан извештај од ДУИ и Алијансата за Албанците за тоа што е опфатено во владината програма од заедничката декларација на албанските политички партии и со какви динамика таа ќе се спроведува. Од БЕСА предлагаат на состанокот да се расправа и за изработка на план за Предлог-законот за албански јазик и формирање на работните групи за негова имплементација.