ВМРО-ДПМНЕ: СЈО е партиска експозитура на СДСМ

ВМРО-ДПМНЕ смета дека СЈО повторно потврдило оти функционира единствено како партиска експозитура на СДСМ во правниот систем и дека предметите кои ги води ова обвинителство не се ништо друго туку, како што велат од партијата, реализација на политичките нарачки на Зоран Заев, нешто што македонските граѓани го плаќаат со 4 милиони евра годишно.

- СЈО уште еднаш се докажа како крајно непрофесионална, необјективна и партизирана институција. Основната цел на Катица Јанева не е правдата, туку слугување на пропагандата на СДС. Дури и бруцош на правниот факултет знае дека во апсурдните обвиненија на Јанева не постојат докази за каков било криминал, а истрагите кои ги отвора се срам за кој било обвинител во светот, се вели во денешното соопштение од ВМРО-ДПМНЕ.

Од партијата посочуваат дека основната цел на Катица Јанева била и останува „обезбедување на приказни за медиумите под контрола на СДС за оцрнување на ВМРО-ДПМНЕ кое треба да помогне во дефокусирање на јавноста од ветувањата што ги даваше Заев во предизборниот период“.

- Без оглед на приказните со кои СЈО ги храни лажните вести на СДС, граѓаните од Заев и новата влада очекуваат нови 500 километри автопат, просечна плата од 30.000, а минимална од 16.000 денари, додека пак докторите очекуваат плати од 100.000 денари, се вели во соопштението.

Во него се додава дека СДСМ ќе мора да се соочи со реалноста, според која ВМРО-ДПМНЕ на првата владина седница донела одлука за отпис на долгови на граѓани, а оти СДСМ на првата владина седница одлучува да урива градби и да укинува започнати проекти и реформи. Разликите во владеењето ги гледаат граѓаните, велат од ВМРО-ДПМНЕ од каде истакнуваат дека тоа ќе го види и СДСМ на првите наредни избори.