Московиси: Сакаме оценката за грчките реформи да се финализира до пред Велигден

Разговорите меѓу Грција и кредиторите за реализација на третата програма од финансиската помош за земјата напредуваат во вистинскиот правец, изјави еврокомесарот за економски и монетрани прашања, Пјер Московиси, во одговорот на прашањето на грчкиот европратеник од владејачката партија СИРИЗА, Димитрис Пападимулис.

Како што информира весникот „Етнос“, Московиси изјавил дека желбата е финансиските институции (ЕК, ЕЦБ, ММФ, ЕСМ) својата оценка за реформите, што досега се реализирани од грчката Влада, да ја финализираат до Велигден.

Еврокомесарот потенцира дека заминувањето на претставниците на кредиторите од Атина не треба да се толкува како неуспех или казна, туку како неопходност за завршување на оваа оценка.

Од оваа оценка ќе зависи дали министрите за финанси од еврозоната да го одобрат доделувањето на новата транша меѓународна макроекономска помош за Атина, како дел од третата програма, во вредност од 86 милијарди евра.