Маск најави „Грокопедија“ – нова енциклопедија како ривал на Википедија

Милијардерот Илон Маск објави дека преку својата компанија за вештачка интелигенција xAI работи на нова платформа под име „Грокопедија“ (Grokipedia), која треба да биде конкуренција на Википедија.

Маск, кој е сопственик на социјалната мрежа Икс, вели дека новата услуга ќе претставува „масовно подобрување“ во однос на онлајн енциклопедијата чијашто содржина ја уредуваат волонтери. Тој често ја обвинува Википедија за политичка пристрасност и левичарски гледишта.

Името е изведено од чат-ботот „Grok“ на xAI, кој Маск го опишува како „максимално ориентиран кон вистината“. Сепак, „Грок“ предизвика контроверзии поради антисемитски коментари, кои компанијата на Маск ги припиша на „грешки во програмирањето“.

Објавата следи по критиките на Дејвид Сакс, сојузник на Маск и новоименуван комесар за вештачка интелигенција во администрацијата на американскиот претседател Доналд Трамп, кој предупреди на користење содржини од Википедија за тренирање на АИ системи. 

МИА