Македонската туристичка понуда на меѓународен саем во Софија

Туристичката понуда на Македонија е дел од меѓународниот саем за туризам „HOLIDAY&SPA EXPO“, што се одржува во Софија за да се подобри промоцијата на македонскиот туристички производ на бугарскиот пазар и да се зголеми протокот на бугарски туристи во текот на целата година.

Покрај  промоцијата на убавините на Македонија на штандот на саемот, од македонската Агенција за промоција и поддршка на туризмот (АППТ),  организираат активности за соработка и размена на искуства со чинителите на бугарскиот туристички  пазар. Остварени се работни состаноци со македонскиот приватен сектор на кои се дискутирало за состојбите во туризмот и можностите за заедничка регионална промоција, соопшти АППТ.

Директорот на Агенцијата за промоција и поддршка на туризмот на Љупчо Јаневски се сретнал со бугарски тур-опертори, асоцијации и здруженија на региони и општини за меѓугранична туристичка соработка, а дополнително ја промовирал државата преку интервјуа за бугарски медиуми.

Според статистичките податоци, бугарските туристи најмногу патуваат во Југозападниот и Скопскиот регион, поточно Охрид и Скопје се најатрактивните дестинации во Македонија кои бугарските туристи ги посетуваат за време на одморите, иако преферираат и екскурзии во винскиот регион, како и посета на културни знаменитости, традиционални манифестации, спортски настани и бизнис патувања.

Во изминативе пет години регистрирано е постојано зголемување на бугарски туристи, а во периодот јануари – декември 2017 година, споредбено со истиот период 2016 година, бројот на бугарски туристи е зголемен за 24 отсто, додека ноќевањата бележат раст за 25 проценти за истиот период.  

Првиот ден од 35. Издание на интернационалниот саем за туризам „HOLIDAY&SPA EXPO“ во Софија, е отворен само за професионалци во туристичката индустрија на кои им се овозможува удобна работна средина со цел подобро вмрежување со тековните партнери и запознавање на нови.  Секоја година саемот е домаќин на повеќе од 350 изложувачи и над 20.000 професионалци од туристичката индустрија – учесници, посетители и гости.