Левендис: Владата да ја притисне ПЈРМ да промени став во прашањето за името

Лидерот на малата грчка партија, Сојуз на централисти, Василис Левендис, се залага да нема отстапки од позицијата против сложено име со вклучен терминот Македонија и воедно ја повикува грчката влада да ја притисне нашата земја да промени став во прашањето за името, наведува грчката агенција АНА-МПА.

Левендис се сретна со шефот на грчката дипломатија, а средбата поминала во многу добра клима.

Како што јави дописничката на МИА од Атина, Левендис по средбата со Коѕијас изјави дека Сојуз на централисти остануваат верни на нивните ставови и во Парламентот нема да гласаат за евентуален договор за име со вклучен терминот Македонија.

- Господинот Коѕијас верува дека ако Скопјаните направат уште неколку отстапки, веројатно ќе се најде решение. Секако, кога вели решение, мисли на тоа да го содржи терминот Македонија. И ова го кажа без страв, рече дека сме голема држава и нема зошто да се плашиме од една помала држава, од Скопје. Но, јас му одговорив дека Турција е десет пати поголема од Грција, така што со истата логика, Турција ќе треба да прави што сака и ние да и се покориме на Турција, рече Левендис по разговорите со шефот на грчката дипломатија.

За попладневните часови закажана е последната средба на шефот на грчката дипломатија со лидерите на политичките партии во рамки на циклусот средби за брифирање за текот на преговорите. Никос Коѕијас овојпат ќе се сретне со одговорниот за надворешна политика во опозициската Нова демократија, Јоргос Кумуцакос откако лидерот на партијата Кирјакос Мицотакис одби брифинг со Коѕијас и побара тоа да го стори Ципрас.