Криминалот од омраза во Германија со раст од три четвртини за една година

Истражувањето на германската Влада за квалитетот на животот во земјата, покажува дека во споредба со 2014 година, лани за огромни 77 проценти пораснал бројот на криминални акти мотивирани од омраза, јави дописникот на МИА од Берлин.

Во извештајот на 323 страници, со кој германската Влада одговара на прашања на свои 16.000 граѓани, се смета за алармантен, затоа што во него се евидентирани над 10.300 криминални акти мотивирани од политички разлики, ентичка припадност, боја на кожа или религија.

Во најголем број од овие случаи, дури 8.529, жртви се странци што претставува раст од 116 проценти, а криминалот причинет од омраза на интернет пораснал за 176 отсто со вкупно 3.084 случаи.

Весникот „Пасауер Ноје Пресе“ тврди дека ланскиот извештај за кој денеска треба да се произнесе Владата во Берлин, има најголем негативен тренд од 2001 година, па досега. Весникот забележува дека трендот на криминал од омраза е контрадикторен со главната желба на сите испитаници за „толеранција и почит кон сите поединци“.

Според извештајот, граѓаните од германските власти очекуваат да се справат со провалните кражби, кои се зголемени за 10 отсто и се на ниво од 167.000 во 2015 година. Меѓу главните очекувања на германските граѓани е и зголемување на процентот на решени случаи на криминал, кој лани паднал на 27 отсто во споредба со 32,3 проценти во 1998 година.